தொடர்வது ஏனோ...

வறுமை எமை சூழ்ந்த போதும் வாரிசுகளை வளர்த்தெடுக்க
வாடி நொந்த நெஞ்சங்களால்
வாழ்வியல் மறந்து போனோம்

வந்து காப்பாற்றுவார் என்றிருந்த
வாரிசுகள் மன அழுத்தங்களில்
வழி தவறி முறையற்ற முடிவை
வரித்துக் கொண்டதால் மனதில்

வடுக்கள் வார்த்தெடுத்து விட்ட
வலிகள் சொல்லி அழ முடியவில்லை
வாழ வழியும் தெரியவில்லை
வந்து உதபுபவர் யாரும் இல்லை

கர்ப்பத்தில் கலைந்திருந்தால் உம்
கனவுகள் சிதைந்திருக்காதே எம்
கண்களில் நிழலாடி விட்டு இன்று
காணா தேசம் சென்றதேனோ

உலாவரும் தென்றல் நிலை மறந்து
ஊதக் காற்றாய் மாறிப் போனது
ஊதாக் கதிர்கள் ஓசோன் படலம்
உடைத்து உயிர்களை கொன்றது

கதிர்கள் விரியவும் இல்லை
காரிருள் விலகவும் இல்லை
கதி என்று நம்பியவரிடம்
கருணையை காணவும் முடியவில்லை

அநீதி கண்டு எதிர்த்து நிற்கும்
ஆற்றலேறுகள் அமைதி காப்பதேன்
அடிமையாய் அடங்கி போனதேன்
ஆற்றாமை தான் காரணமோ

உள்ளொன்றும் புறமொன்றுமாய்
உத்தமர் சிலர் இரட்டை வேடங்கள்
உலகில் கோலோச்சும் போது
உண்மைகள் மடிந்து தானே போகும்

அனிதாவோடு நின்றிடும் நீட் என்றார்
அது தொடர்கதை ஆனதும் ஏனோ
நீட் தேர்வின் கொடுமைகள் இன்னும்
நிரந்தரமாய் தொடர்வதும் ஏனோ
நியாயம் தெரிந்தோரே சொல்லுங்கள்

கவின் முகில் மு முகமது யூசுப். உடன்குடி